Domaine de La Ville Heleuc 

.

Le Fournil

Le Fournil estas la iama bakejo de la biendomo de La Ville Heleuc. En tiu  malgranda domo, kiel ni ankorŭ ofte nomas ĝin, ni ekloĝis, kiam ni alvenis antaŭ pli ol 30 jaroj en Bretonujon. En 2010/11 ni pligrandigis tiun dometon, kiu kovris bazan areon de nur ĉirkaŭ 30 m² per ligna konstruaĵo kaj renovigis ĝin defunde. 25 jaroj post La Forge, Le Fournil pretis akcepti niajn gastojn. 

Ni uzis ekskluzive ekologiajn materialojn por la renovigo (ligno, kanabo, kalko, tero, granito, ...) por ke oni sentu sin komforte dum la tuta jaro. Mebloj kaj aranĝoj estas modernaj, simplaj kaj kiel eble plej naturaj. Koloraj tuŝoj en tiu natura medio memorigas pri la iama celo de la konstruaĵo: ruĝo kaj oranĝo, sed troveblas ankaŭ la verdo de naturo, espero kaj Esperanto. Sunlumo eniras tra grandaj fenestroj kaj en la teretaĝo kaj en la supra, tiel ke arta lumigo apenaŭ bezonatas. Muroj spiras pro mortero el kalko, kanabo kaj tero. Ĉiuj elektraj kabloj estas protektitaj, lumigoj ekipitaj de ledoj aŭ ekonomiaj ampoloj kaj kranoj aŭtomataj kaj ekipitaj de akvoŝpariloj. Malsupre hejtado venas de nia centra lignopecohejtilo tra la planko kovrita de granitoj platoj de la monteto Isaak, tiel eĉ en malvarma sezono agrablas iri nudpiede.

Kvankam ne eblis respekti ĉiujn normojn Le Fournil estis pensita por rulseĝuloj. La enirejo ne havas ŝtupojn kaj en la teretaĝo ĉiuj ĉambroj kaj ankaŭ la teraso estas samnivelaj. La dormoĉambro havas apudan samnivelan duŝejon kaj la lavujo estas uzebla de rulseĝo. Larĝa vitra pordo malfermiĝas al la teraso. La necesejo estas aparta kaj malfermiĝas per granda glitpordo. En la granda vivoĉambro troviĝas la kuirejo, la manĝejo kaj la salono. Du vitraj glitpordoj ebligas eliri sur la terason, kiu laŭas la domon ĉe la orienta kaj la suda flanko. En la salono troviĝas radio-cd-dvd-aparato konektita al projekciilo kaj televidorecivilo. Libroj, ludiloj, puzloj, ... disponeblas.
Supre troviĝas granda ĉambro disigeblaj per kurtenoj. Laŭbezone la du unupersonaj litoj transformiĝas al unu granda aŭ la sofoj. En la ŝranko atendas du bebolitoj kaj futono la gastojn. Je la suda flanko troviĝas la banejo kaj ludĉambro. Le Fournil estas tute ekipita por beboj kaj infanoj.

Por unu aŭ pluraj semajoj, por semajnfino aŭ kelkaj tagoj, Le Fournil invitas vin malkovri naturan konstrumanieron en eksterordinara medio - Bretonujo alimaniere!

Por sekvi gvidatan viziton de Le Fournil bonvolu klaki ĉi tien.

Monato	Luprezo 2013		2013	2 personoj	Kroma persono
novembro ĝis aprilo (krom jarfino)	595 €		2 noktoj	195 €	30 €
majo, junio septembro, oktobro	695 €		kroma nokto	90 €	15 €
julio, aŭgusto jarfino	795 €
Tiuj ĉi prezoj estas kompletaj. Ili inkluzivas energion (elektron, gason, akvon) kaj finan purigadon. Senpage ni disponigas al vi litotukojn, bantukojn (1 grandan, 1 mezan kaj 1 lavganton per persono), spongon, mantukojn, tablotukon kaj ekologian telerlavaĵon. Sen kroma kosto vi povos uzi la varmakvujon, la saŭnon, la biciklojn la bebaferojn (lito, matraco, puŝĉaro, alta seĝo, ...), ktp.